The Great Escape (1963)

Klassík eins og hún gerist best.

Hér er á ferðinni nokkurveginn sannsöguleg mynd sem á að gerast í seinni heimstyrjöldinni. Fylgjumst við með þar sem fangabúðir þýska flughersins halda flugmönnum andstæðinganna, flestir Bretar þó. Ef dýr er læst inni reynir það allt sem það getur til að sleppa allt þar til það brotnar saman og þessir menn hafa ekki brotnað enn !

Allt sem viðkom myndinni er hið flottasta, saga, leikur og sviðsmynd. Ekki skemmir heldur að hafa nagla eins og Steve McQueen í fararbroddi. Hefði þó verið skemmtilegra að heyra Þjóðverjanna tala meiri þýsku en svona er þetta bara. Ég get vel ímyndað mér að fangabúðir Luftwaffe hafi í raun og veru verið svona. Með smá mannsæmandi aðstöðu, ólíkt Auswitsch og því líkum sora. Hér báru andstæðingarnir enn þá virðingu fyrir hvorum öðrum og voru í alla staði almennilegir, harðir en almennilegir. 

Framvinda myndarinnar er frábær og spennandi. Hvergi dauður punktur í rauninni. Persónurnar eru jafn vel túlkaðar og þær eru margar. Þetta er náttúrulega Hollywood mynd og með öllu sem því fylgir... en það þýðir þar með sagt ekki að hún þurfi að vera lélegri. Þetta er bara einfaldlega svo skemmtilega sett fram. Þetta er klárlega ein af þeim myndum sem hafa elst vel í gegnum árin.

Athugasemdir

[Siggi Palli (IP-tala skráð) 11.4.2008 kl. 21:47]

Tek undir það - rosa klassík. Fyrir aðra mjög góða Hollywood-mynd um sama efni, þá mæli ég með Stalag 17 í leikstjórn Billy Wilder.

3 stig.